بمباران ولایت تخار توسط جنگنده‌های تاجیکستان

"محمد جواد هجری"، سخنگوی والی تخار به رادیو بین‌المللی فرانسه گفت که «این حمله در واکنش به درگیری که عصر روز یکشنبه ۴ سرطان میان جنگل‌بانان تاجیکی و قاچاق‌بران مواد مخدر در نقطه صفری منطقه "درقد" ولایت "تخار" رخ داده بود، راه اندازی شد».
مقام‌های محلی تخار می‌گویند که در این نقطه صفری، نه نیروهای امنیتی افغانستان پاسگاه دارند و نه این منطقه در اداره حکومت افغانستان است.

محمد جواد هجری، سخنگوی والی تخار تأیید می‌کند که «در درگیری میان قاچاق‌بران و جنگل‌بانان تاجیکستانی، ۲ تن از جنگل‌بانان توسط قاچاقبران مواد مخدر که درحال انتقال مواد مخدر به تاجیکستان بودند کشته می‌شوند».
دولت تاجیکستان نیز ساعاتی بعد از این درگیری و درتلافی به کشته شدن دو شهروندش، نخست بر این منطقه صفری، خمپاره شلیک می‌کند و سپس صبح امروز دوشنبه، جت‌های جنگی تاجیکستان این منطقه را بمباران می‌کند.
سخنگوی والی تخار می گوید که «هنوز تلفات جانی و خسارات مالی این رویداد روشن نیست و بررسی‌ها برای روشن شدن خسارات و تلفات این حمله هوایی، جریان دارد».

همزمان با این، اما "خلیل اسیر"، سخنگوی پولیس تخار تأیید می‌کند که در درگیری روز گذشته ۲ مرزبان تاجیک و ۶ جنگجوی طالبان کشته شده و ۹ طالب دیگر نیز زخمی شده‌اند.

سخنگوی پولیس تخار، همچنان تأکید می‌کند که «طالبان در این بخش از منطقه درقد در ولایت تخار افغانستان، پاسگاه ایجاد کرده و با قاچاق‌بران در تجارت مواد مخدر همکاری می‌کنند».
در چند ماه گذشته، امنیت این ولایت شمال شرقی افغانستان بدتر شده است. چنانچه در ماه‌های پسین، بارها نیروهای مسلح ضدنظام و طالبان، بر پاسگاه‌های نیروهای امنیتی افغانستان در بخش‌های گوناگون این ولایت حمله کردند.
در اوایل ماه جاری میلادی نیز گزارش‌هایی مبنی بر کشته شدن چندین تن از نیروهای مرزی افغانستان در منطقه "دشت قلا"ی این ولایت نشر شد.

"تخار" در شمال شرق افغانستان، با کشور تاجیکستان مرز مشترک دارد و از جمله ولایت‌های ناامن افغانستان در شمال این کشور به شمار می‌رود.